تلفزيون الهلال السوداني

ركز المدير الفني للهلال الفرنسي غارزيتو في مران فريقه أمس التكتيكي الذي رسم فيه أهم ملامح استراتيجيته الخططية لخوض اللقاء المهم والكبير أمام نده المريخ غدًا الثلاثاء باستاد الهلال بأم درمان، حيث عمد الفرنسي على تنفيذ جميع توجيهاته بحذافيرها وأوقف المران أكثر من مرة لتصحيح الأخطاء ودعم الايجابيات، وقد أجرى الجهاز الفني تقسيمة كاملة بين اللبني الذي كسب الجولة بهدفي ساني وفداسي ومثله جمعة ، سامي ، صالح الأمين ، معاوية فداسي ، سنكارا ، خليفة أحمد ، دومنيك ، محمد أحمد ، سيدي بيه ، ساني ، بكري المدينة ، محمد عبد الرحمن ، عبده جابر .. والأخضر الذي مثله بهاء الدين «المعز» ، عبد الرحمن كايا ، سيف مساوي ، عبد اللطيف بوي ، عمر بخيت ، نزار حامد ، محمد أحمد بشه ، الغيني اكانقا ، مهند الطاهر ، المالي تراوري وكاريكا، وقد نفذ الفرنسي غارزيتو بمعاونة مساعده السنغالي مامادو جميع النواحي التكتيكية والخططية التي سيخوض بها لقاء الغد أمام المريخ.

 

المرابط يحرج المرشح بهدفي ساني وفداسي

أحرج الفريق المرابط الذي مثله جمعة ، سامي عبد الله ، صالح الأمين ، فداسي ، سنكار ، خليفة ، محمد أحمد ، دومنيك ، سيدي بيه ، ساني وبكري المدينة بالفوز على الفريق المرشح بهدفي السنغالي ابراهيما ساني معاوية فداسي، وقد مثل المرشح العناصر مساوي ، كايا ، بوي ، عمر بخيت ، نزار حامد ، بشه ، اكانقا ، مهند ، تراوري و كاريكا، ويعتبر المعز محجوب أقوى المرشحين لحراسة عرين الأزرق في الديربي.

 

الهلال يختتم تدريباته صباح اليوم بالخارجية

يختتم فريق الكرة بنادي الهلال تدريباته صباح اليوم بملعب الخارجية تأهباً لمباراة ديربي القمة غدًا الثلاثاء ضمن الجولة الرابعة لبطولة الدوري السوداني لكرة القدم.

 

المصدر قوون

اختتم فريق الكرة بالهلال تدريباته صباح امس بملعب الخارجية وذلك استعدادا لمباراته اليوم امام المريخ في ديربي امدرمان الكبير ضمن الجولة الرابعة لبطولة الممتاز والتي يتصدرها الهلال برصيد 9 نقاط من ثلاثة انتصارات وتأهبا لمواجهة اليوم امام المريخ اجري الفريق مرانا قويا وساخنا في اجواء ترويحية والتي كانت من ابرز سمات المران فقد وضح بان الجميع في اهبة الاستعداد والجاهزية النفسية والبدنية تحت اشراف المدير الفني الفرنسي غارزيتو وطاقمه المعاون وبمشاركة جميع اللاعبين حيث بدأ المران بالاحماء بالكرة ومن ثم تبادل الكرة بالايدي وبمشاركة جميع اللاعبين وكان طابعها السرعة والحركة المستمرة واللعب للزميل وذلك بعد تقسيم العناصر لثلاث مجموعات.

تدريبات تكتيكية:

اخضع الفرنسي غارزيتو جميع العناصر لتدريبات شاقة ومتنوعة حيث قسم الفريق لثلاث مجموعات اخضر وسماوي وبني وقد اشتمل هذا التدريب على كيفية تخطي الخصم والتهديف القوي في المرمي وذلك من خارج منطقة ال 18 والتوغل داخل الصندوق والضغط علي حامل الكرة بلاعبين وعدم منحه المساحة والزمن للتهديف وقد برز في هذا التدريب التكتيكي المحترف سيدي بيه وعبده جابر ومحمد عبدالرحمن وبكري ومهند الطاهر 

الشغيل يتدرب مع المجموعة:

تدرب نصرالدين الشغيل مع المجموعة ولامس الكرة للمرة الثانية وتحرك بفاعلية ولعب بقوة

تقسيم اللاعبين لمنتخبين

نفذ الجهاز الفني بقيادة غارزيتو بعض الجمل التكتيكية التي سيؤدي بها الفريق مباراة اليوم امام المريخ حيث اشرف المدرب علي المجموعة التي تكونت من المعز ومساوي وبويا وكايا ونزار وعمر واكانقا وسنكارا وسانيه وتراوري وكاريكا وبشه وسامي وخليفة ومهند حيث اخضعهم لتدريبات تكتيكية متنوعة ومختلفة تمثلت في عكس الكرات من الاطراف والضربات الركنية والثابتة والمتحركة والتي كانت عن طريق مهند واكانقا من الجهة اليسري وسنكارا وخليفة من اليمين وقد تألقت خلاله هذه المجموعة في احراز الاهداف وافلح الدفاع والوسط في افساد بعض الهجمات وابعادها بالرأس والقدمين وكذلك التعامل مع الهجمات التي يشنها الخصم وابعاد الكرة اول باول وقد تألق مهند واحرز هدفا من تسديدة قوية وكذلك احرز تراوري هدفا من كرة سددها ارضية زاحفة وهدد مرمي المعز بالرأسيات الخاطفة وتألق سانييه في تحويل المعكوسات

انطوني وجوان اشرفا علي المرابط:

تولي الفرنسيان انطوني وجوان مهمة الاشراف علي الفريق المرابط حيث تم تقسيم الفريق الي مجموعتين وقد قاد جمعة الاخضر بجانب بكري وفداسي ودومنيك ومحمد عبدالرحمن بينما مثل الازرق بهاء الدين وسيدي بيه والشغيل ومحمد احمد وعبده جابر وقد كانت التقسيمة قوية ومثيرة بين الجانبين وشهدت عددا من الاهداف

الفرنسي يدرب الرباعي علي ضربات الجزاء:

درب الفرنسي غارزيتو الرباعي الهجومي مدثر كاريكا - الغزال مهند الطاهر - السنغالي ابراهيما سانييه والمالي تراوري علي تنفيذ ضربات الجزاء في مرمي المعز حيث نجح كاريكا والغزال وسانييه في احراز جميع الضربات بينما اهدر تراوري هدفا من ثلاثة تهديفات حيث لم يترك الفرنسي اي شئ للظروف وتحوط لكل الظروف حتي يظفر بنقاط المباراة ويحافظ علي الصدارة قبل المواجهة المرتقبة امام العاجي السبت المقبل.

الفرنسي تحدث مع اللاعبين عقب نهاية التدريب:

بعد نهاية تدريب الامس الختامي الذي اداه الهلال صباحا بالخارجية تحدث غارزيتو مع اللاعبين وطالبهم بالتركيز في المواجهات المقبلة ابتداء من مباراة اليوم حتي يواصل الهلال انتصاراته ويتمسك بالصدارة:

ابوشامة: التشجيع المثالي يساعد في تقديم مباراة جميلة:

ذكر محمد عبدالقيوم ابوشامة مقرر دائرة الكرة بالهلال بان الازرق اكمل استعداداته لمواجهة اليوم امام نده المريخ وقال بان المواجهة صعبة ولاتخضع للتكهنات ولكنها خاضعة للاحتمالات الثلاث في كرة القدم فوز وتعادل وهزيمة واشار بان جميع اللاعبين بالكشف سينتظمون في المعسكر وابان بانه يتمني ان يأتي الجمهور من اجل التشجيع المثالي حتي يقدم اللاعبون مستوي قويا بعيدا عن الشحن الزائد وكذلك علي الاعلام ان يعمل على تبصير الجماهير بذلك لان دوره مؤثر حتي تخرج القمة بمستوي يليق بها وعلي جمهور الهلال ان يأتي من اجل الاستمتاع بمهارات نجومه في مباراة اليوم ووداع اللاعبين قبل المغادرة لساحل العاج.

قطب الهلال صلاح الدين يكرم الثلاثي:

كرم قطب الهلال الشاب صلاح الدين احمد محمد المقيم بسنغافوره ثلاثي الهلال صباح امس بالخارجية عقب نهاية التدريب حيث قدم حذاء لسيف مساوي من ارقي الماركات العالمية ولبس كامل للحراس حيث قام بتسليمها لدائرة الكرة جدير بالذكر ان صلاح الدين يعمل مترجما بسفارة الامارات بسنغافوره وكان لاعبا ببراعم الهلال حيث قدم الحذاء لمساوي برفقة معروف ومشجع الهلال خالد سياحة واكد صلاح بان التكريم لفتة رمزية علي اساس اشعار اللاعبين بالوقوف معهم حتي يحققوا الانتصار في مباراة اليوم ويكون مشوار الازرق اخضرا في الدوري.

مساوي يشكر صلاح الدين ويؤكد مواصلة الانتصارات:

شكر نجم دفاع الهلال سيف مساوي قطب الهلال الشاب صلاح الدين احمد محمد على هذا التكريم والتحفيز واكد بانه بمثابة تحفيز لكل لاعبي الهلال وابان علي مقدرتهم علي مواصلة الانتصارات وذكر بانهم جاهزون لمواجهة المريخ والمقابلة الافريقية امام بطل ساحل العاج وقال انتصاراتنا لن تتوقف.

سانيية سأكرر هدفي في المريخ:

تحدي محترف الهلال السنغالي ابراهيما سانييه دفاع وحارس المريخ في مباراة اليوم وقال بانه سيعمل على احراز اكثر من هدف وذكر بانه قادر على تكرار هدفه الرأسي في شباك الحضري.

الكوارتي: المباراة عادية وجاهزون والنصر حليفنا

الهلال الافضل وجمهوره مثالي ومذكرة المريخ خطوة استباقية:

اكد عضو دائرة الكرة بنادي الهلال الشاب محمد عثمان الكوارتي بان الازرق جاهز لمباراة اليوم امام المريخ في الدوري الممتاز والذي يتصدر الهلال ترتيب المنافسة برصيد 9 نقاط من ثلاث انتصارات ويسعي لمواصلة الانتصارات والانفراد بالصدارة وقال بان اللاعبين جاهزون لتقديم مباراة قوية ونتيجة عريضة ومتفائلون وابان بان النصر سيكون حليف الفرقة الهلالية والتي تعتبر الان الافضل لما تضمه من عناصر مميزة قادرة على هزيمة اي فريق داخليا وخارجيا وقال ان المباراة عادية بالنسبة للازرق وسيدخل بمعنويات مرتفعة بعد انتصاراته المتلاحقة في البطولة المحلية ومن جانب اخر فقد وصف الكوارتي المذكرة التي تقدم بها الوصيف للاتحاد العام لكرة القدم مطالبا فيها حماية لاعبيه من الاساءة في مباراة اليوم حيث قال جمهورنا وفي ومهذب وراقي ومثالي لايعرف الاساءات والعنف وتحطيم الكراسي وهذه الافعال لاتشبهه وهذه الافعال افعالهم وقد حطموا اكثر من مرة كراسي استاد الهلال وهذه المذكرة الهدف منها زعزعة الاستقرار النفسي للجمهور واللاعبين وهي خطوة استباقية لما يتوقعونه ان يحدث اثناء المباراة وبدورنا في دائرة الكرة نؤكد بان جمهور الهلال لايمكن ان يفعل مثل هذه الاشياء ويكفيه شرفا منحه جائزة الجمهور المثالي من قبل الكاف وهذا هو مخطط يقوم علي زرع بعض العناصر التي لا علاقة لها بالهلال وسط الجمهور الهلالي وسنقوم بحسمهم بمجرد ارتكابهم اي افعال تخريبية والهدف الذي يرمي له المخطط هو تشتيت الجمهور الي كتل متفرقة حتى لاتحدث الفارق في التشجيع لانها مصدر قوة انتصارات الهلال وعلي جمهورالهلال مساندة نجوم الفريق بقوة وعدم الالتفات لمثل هذه الاشياء.

المصدر قوون

 

اجتماع مغلق مع السداسي:

اجتمع رئيس نادي الهلال الامين البرير مساء امس بسداسي فريق الهلال بقيادة الكابتن عمر بخيت - كاريكا - بشه - المعز - مساوي ومهند في غرفة مغلقة ببيت اللاعبين وتحدث معهم علي ضرورة التركيز ومواصلة رحلة الانتصارات وقيادة زملائهم القدامي والجدد لانهم كبار الفريق وكباتنه.

 

البرير يسجل زيارة لمعسكر الفريق

قام رئيس مجلس ادارة نادي الهلال بزيارة مساء امس لمعسكر الفريق بمنزل اللاعبين بالمهندسين مع نائبه كرار التهامي وعماد سيد ومدير دائرة الكرة خالد بخيت حيث تحدث مع اللاعبين عن اهمية مباراة اليوم امام المريخ والتي ستكون صعبة وطالبهم بضرورة التركيز واحترام قرارات الحكام وعدم الاعتراض على قراراتهم وكذلك عدم الالتفات لاستفزازات الجمهور والخصم.. وقال لهم انتم الافضل في الساحة ونحن نثق في مقدراتكم علي مواصلة الانتصارات داخليا وخارجيا ومباراة اليوم ستحدد بشكل كبير قدرتكم على الاحتفاظ بالدوري في حالة الفوز.

 

رئيس النادي ينفرد بالجهاز الفني

تحدث رئيس نادي الهلال الامين محمد احمد البرير على انفراد مع الطاقم الفني للهلال حيث ناقش معهم جاهزية الفريق لمواجهة اليوم ومن ثم المباراة الافريقية حتي يواصل الازرق انتصاراته داخليا وخارجياً.

 

المصدر: قوون

• عبدالله حسن عيسي زعل ...شال (شنطتو) ...ومشي بيت ابوه.

• قال الشغل دا انا ذاتو خليتو ..شوفوا ليكم (نائب رئيس) غيري.

• شفتوا عبدالله حسن عيسى دا ..الزول الفاهم ...ومتعمل ومسؤول كبير في الدولة ..وقت يحرن في الشيء ببقى زي (ضفر) واحد.

• ما بتفاهم.

• المريخاب ديل قدر ما حنسوا عبدالله حسن عيسي ، وحاولوا معاه ، عبدالله دا رافض رفضا قاطع ..(زي رفض الجامعة العربية وقت تطلع ليها بيان ملتهب ..وساخن).

• اخر حاجة مشى ليه هيثم مصطفى في بيتو..قعد معاه ...حصل شنو؟..قال ليه شنو؟..ما عارف.

• ولدنا خطير ..في الحاجات دي بقنع ليك (الحجر).

• عبدالله حسن عيسي اليوم التاني جاء النادي طوالي ..لافي عمتو ..ولابس جلابيتو (ناسى اي حاجة) ...والدليل على مباشرته للعمل في النادي ..قعد في نادي المريخ ..وورنش جزمتو كمان.

• شفتوا الانبساطة دي.

• طبعا (ورنيش الجزمة) دي عندنا نحن في شندي ...دليل مباشرة...(مباشرة عمل يعني).

• الواحد من يورنش جزمتو ..معناتها مبسوط ...وعاوز يشتغل او ماشي لي ناس نسابتو.

• ما تقعدوا تنططوا لي عيونكم كدا ..زي (الملاحة) الفاضية في صينية الغداء.

• انا ما عارف السر في الحكاية دي شنو؟.

• في ناس كدا ..قدر ما امشي ليهم اتغدي معاهم...يجيبوا  لي في الصينية (الملاحة) فاضية ..لا ملح ..لا شطة.

• السر في ذلك شنو؟...ما عارف والله.

• الموضوع دا يمكن يكون وراءه منظمة اجنبية ...(عاوز افكر ليكم زي تفكير منبر السلام العادل).

• يرسلوا الولد عشان يجيب (الشطة والملح) يقعد ساعة ، لمن تقوم من الصينية ..الولد ما يرجع.

• تقول مشى يجبها من (مومباي).

• شفتوا لمن تكون بتغسل في الماسورة ...الولد يجيك متل (الدو في اخر اللعب) شايل الملاحة ..وهو ينفض في (شلاليفو).

• انت تعال هنا يا عبدالله يا حسن يا عيسي.

• انت الزول يزعلك ..ويرضيك.

• انت موش زعلت بسبب تسجيل هيثم في المريخ ..ومشيت قعدت في بيتكم.

• وموش هيثم دا ذاتو هو الذي جاء لك في البيت ...ورجعك للنادي.

• عليك الله ..يرجع لي (ناديك يناديك)..زول ليه 15 يوم في المريخ ..و17 سنة في المريخ.

• يعني انت يا عبدالله بي (خفتك) دي ..لو جاك (مدثر كاريكا)...مريخ الفاشر ممكن ترجع ليه.

• معقولة بس ...زول يزعل الساعة 6 مساء ...يرجع عشرة ونص صباحا.

• عمليتك دي (الفجل) ما بعملها.

• عشان ما تقعدوا تشرعوا لي ساكت ...وتنظروا (الفجل) ما عندو اي دخل بالموضوع دا.

• بس ساكت حبيت (اتفجل) عليكم.

• عبدالله رجع ...لكن قالوا عصام الحاج ..قال ليه ..ترجع ساكت ..اي قرار نطلعو توقع عليه.

• ما عاوزين كلام كتير.

• عندك قروش للنادي ..تدفعها من بدري ...وتتخارج.

• عبدالله حسن عيسي قال ليه ما اي مشكلة.

• عليكم الله امشوا معاي خطوة ...خطوة ...ما تضيّقوا ..(المباراة لسع).

• خلوني اكمل ليكم موضوع (هيثمة) المريخ.

• يا رجال.

• يا جدعان.

• يا خلف ابومنذر ...المريخ (اتهيثم) عديل كدا.

• فيصل العجب في المريخ بقى زي (ود الجيران).

• ما عندو اي حاجة في المريخ.

• يقوم يسخن ويقعد زي قريب الغطا.

• نطلع فاصل.

• الكهرباء قطعت في  نادي المريخ  (الكلام دا طبعا كلكم سمعتوا بيه)...ناس الكهرباء قطعوها ..بعد استقالة جمال الوالي ..ما في ثقة في (عصام الحاج).

• عصام الحاج دا ...(جاز) الرتينة عندو في مشكلة.

• قالوا ليك (اللمبات) في النادي عاديها.

• المراويح .........مطلع منشور عديل كدا في النادي ما يشغلوها في نمرة اكتر من نمرة (اتنين).

• المكيفات ...شايل (الموتور) حقهن ...عشان ما تشتغل في الاساس.

• مكيفات شنو البشغلها ليكم عصام الحاج ...انتوا جنيتو.

• النادي بقى (ضلمة)..الكلام دا معروف بالنسبة ليكم ..(هسع بعد 21 يوم ناس مامون ابوشيبة بنكروه).

• يا عبده قابل الكلام دا سجلوا لينا ...(انت ما في زول بغالطك).

• العجب بقى يجي النادي خمسة ..ويطلع من النادي ستة ..ويقول ليهم : (لو ضلمت ما بنشوف ..احسن نتلم من بدري).

• طبعا حكاية الشوف دا ...عندها علاقة بالسن ...والعمر ..والقعّاد في الكنبة.

• فيصل العجب من قعّاد الكنبة بقى زي (فاروق الفيشاوي).

• يا احمد الحاج ..عليك الله خت لي صورة (فاروق الفيشاوي) في الصفحة دي...(عشان الجماعة ديل يفهموا حاجة).

• هسع فاروق الفيشاوي ذنبو شنو؟.

• تلافحوا في الكلام ساكت ..(زي بوليس الحركة البجيك طالع فجأة كدا من شجرة النيمة).

• كان وين قاعد ما عارف؟.

• ما تسألوني ..ما بحب الاسئلة الكتيرة.

• ناس المريخ ديل قدر ما لقطوا ليهم قروش ..ما قدروا يجمعوا حق الفاتورة ...قدر ما حاولوا يتصرفوا ما عرفوا.

• عصام الحاج عندو (عتود) باعو ...ما قصر والله ..وازهري وداعة الله عندي (مروحة) فكاها.

• ومتوكل احمد علي حايم بي (ساعتو) في سوق ستة.

• دا كلو عشان يلقطوا حق الكهرباء.

• زمن جمال الوالي ..ترعوا ساكت ..ما جايبين خبر...ما عارفين ذاتو الكهربة دي بتجي من وين؟.

• مجلس المريخ اتصل بي روابط المريخ في الامارات ..في السعودية ...في قطر ...كلهم ما قدروا يجمعوا حق الفاتورة.

• ضربوا لي مصطفى عثمان اسماعيل ..اتصلوا بي السعيد ..ناس القصر ..ناس العدل والمساواة (الحركات الموقعة) ..ناس الشرق.. الاسود الحرة ..كلهم فشلوا في حل مشكلة الكهرباء دي.

• اسبوع كامل نادي المريخ دا (واط) كهرباء واحد ما فيه.

• فيصل العجب بدخل النادي ويطلع زول بعرفو ما في ..(الضلمة شديدة).

• البفتكر فيصل موسي الزومة ..والبقول دا (ضفر)..كلهم ما عرفوا.

• الظاهر نسوه ...كترة القعدة في الكنبة ..بتعمل اكتر من كدا.

• اعضاء النادي شغالين شوف بالعمود النورو عاكس في النادي.

• شيء يشوفها ..وشيء لا.

• شغل بالرقراق.

• اخر حاجة ..قالوا ما في حل غير اننا نبيع (صورة) هيثم مصطفى...ونسدد بقروش (الصور) فاتورة الكهرباء.

• الحكاية دي ما بتحلها إلا (صور) هيثم.

• في واحد فيهم ..قال ليهم عليكم الله يا مريخاب انتوا  ما بتخجلوا ..هيثم مصطفى دا لعب في الهلال (17) سنة...ما فى زول باع ليه (صورة) واحدة ..انتوا يا ناس المريخ الزول دا ليه معاكم (17) يوم عاوزين تبيعوا (صوره).

• وكمان عاوزين تسددوا فاتورة الكهرباء بقروش الصور.

• ناس الموردة ...(الموردة حضارة)..لو سمعوا بالكلام دا ..يقولوا عننا شنو؟.

• ناس الموردة خلوهم ..ناس (النسور) بتودوا وشكم منهم وين؟.

• الكلام دا عيب في حقكم.

• الكلام دا غلط.

• الغريبة ناس المريخ ..الصورة البكون واقف فيها مع هيثم مصطفى الباشا وبلة جابر وموسي الزومة وفيصل العجب ...بقطعوا منها صورة العجب والباشا وبلة جابر وموسي الزومة ..عشان الصورة تتباع.

• بخلوا هيثم براه ..ان ىشاءالله وش بس.

• صورة فيها (بلة جابر)..ما بتتباع ..الجمهور بشوفها ويرجعها...يعمل بيها شنو كمان.

• الناس ديل من (الفلسة) الحصلت عليهم ...هيثم مصطفى دا في تونس صوروه (في البرد داك)..بالطاقية والسيوتر ..عشان يلحقوا بيه السوق.

• يمين اول ما شفت هيثم مصطفى بي طاقية السقط في تونس ...وهو لابس شعار المريخ ..اتخيلتو ليك في حفلة تنكرية.

• تقول في فيلم اجنبي.

• الزول البجيك في اخر الفيلم كدا ...منو وينتهي الفيلم.

• شطبنا يا ابو الشباب ..كدا شوف الدكان التاني داك ..يمكن تلقى عندو موية فول.

• هسع الكلام دا دخلو هنا شنو ؟..(زي التريس البكون وسط التسعات مدسوس ..وانت ما شايفو ، ما تكتشفوا إلا لمن تكون عاوز تنزل).

• طلع من وين؟..ما تسألوني...قلت ليكم انا ما بحب الاسئلة.

• غايتو هيثم مصطفى دا لو لعب في المريخ سنة ..ناس المريخ ديل بطلعوا منو (زيت النعام).

• والله ناس بابكر سلك ديل يلقوا هيثم مصطفى سنة في المريخ ...يعملوه زي (قبقبة) يطلعوا منو دهب عديل كدا.

• ديل بعملوها ...ما في حاجة بتغلبهم.

• المريخاب ديل صعبين ...حاجات زي دي ما بفوتوها ...خاصة بعد ان تولى عصام الحاج امر المريخ واصبح الامر والناهي في ظل ابتعاد جمال الوالي.

• هسع تلقوا عصام الحاج بفكر في استخراج ثاني اكسيد الكربون من (تمريرة) هيثم مصطفى.

• وتحت ..تحت سمعنا قالوا شالوا (اتر) هيثم مصطفى في الواطة ..ودوه (سويسرا)..عشان يطلعوا منو  زيت (الخروع).

• يا زول هسع الخروع الجابو شنو؟.

• وناس قالوا ح يطلعوا منو زيت عباد الشمس.

• يا هيثم غايتو استحمل البحصل ليك في المريخ ...في الهلال كنت مرتاح ..وبالك هادي ...هسع الجماعة ديل ..اي (زيت) عاوزين يطلعوا منك.

• ح يطلعوا (زيتك).

• ولو لقوا ليهم طريقة كمان ...(سمنة) بطلعوها منك.

• لو قالوا ليك ...تعال العصر في مزرعة ..اوعك تمشي ليهم.

• لو قالوا ليك عاوزين نعمل لينا مصنع (سفنجات)..اوعك تمشي ليهم.

• الناس ديل انت ما عارفهم.

• موسي الزومة ...اخر حاجة وقت لقوا نفسهم ما مستفيدين منو بي حاجة ..عارف يا هيثم عملوا ليه شنو؟.

• قالوا ليه الكور البعكسها (بلة جابر) دي ..وتمشي ام بدة ...تمشي تجيبها لينا.

• وما بعيد يقولوا ليه شوف لينا موضوع (الديدان) الفى نجيلة استاد المريخ.

• شايف سلك بقى منسق بتاع (اسمدة).

• مزمل ابوالقاسم بقى يدخل استاد المريخ بي (كمامات)...زي الطبيب البيطري.

• مزمل يكون خايف تجيهو (ديدناية) طائرة.

• هيثم مصطفى ..حل مشكلة الكهرباء ...بي (صورو)...المريخاب اليوم التاني قالوا ليه شوف لينا موضوع الحضري دا.

• انتوا قايلين الحضري دا رجع الخرطوم ساكت.

• الحضري دا هيثم مصطفى شبكوا ليك (مسكولات)...لمن رجع.

• الراح فيها اكرم الهادي سليم.

• اكرم الهادي سليم يتقطع زي (الديدبان)...وفي النهاية الحضري يجي يقيف اساسي في مباراة القمة.

• غايتو يا اكرم انا لو كنت في حتتك دي ...كنت طلعت الكشافة ..وحلفت ما انزل.

• انت وفيصل العجب ..الاتنين مفروض تطلعوا (الكشافات)..او على الاقل كدا تضربوا من (الطعام).

• انا عارف موضوع الاضراب من (الطعام) دا ...بلة جابر ما بوافقكم عليه.

• والله عارف.

• لكن بديكم الحل ..كخيار ..انتوا تطبقوه ..ما تطبقوه...انتوا احرار.

• انا ما عندي معاكم قضية والله.

• هيثم مصطفى حل مشكلة الحضري ..قام اكرم الهادي سليم (حنبك) بي هناك.

• اكرم في (الحنكبة) كمان اكعب من (ضفر).

• قال ما بيلعب.

• انتوا دا شنو الفريق الكلو (زعل) دا؟.

• يجيبوا دا ..يقوم يزعل دا.

• والعجب (الزعل) في الكنبة عاوز يشقو ..لكن ما قادر يقول اي حاجة.

• والله يا العجب ..انت زعلك ظاهر في عيون (احمد الباشا).

• كمان نحن (الزعل)...ما بنعرفو.

• احمد الباشا ما بقدر يدس (الزعل).

• زمان كان اي مباراة للمريخ بطلع هو (نجم المباراة)..هسع الباشا كان لعب (اساسي) ما قصر.

• بكرة بقعدوه في (الكنبة).

• اكرم الهادي سليم ..زعل ..وطلع من المعسكر ..(كيف الحضري يجي من بيت ابوه ويلعب اساسي)...وهو يا حسرة ..متقطع في (الديدان) دا ...وبرضو ما بلعبوه في المباريات الكبيرة.

• اكرم زعل وقفل تلفونو.

• هيثم مصطفى دور ليك (مسكولات).

• لا والله ...المرة دي ضرب ليه عديل كدا ..واشتغل (تحانيس).

• كب ليك في اكرم الهادي سليم دا جنس (تحانيس).

• بدأ ليك من عمرو بن كلثوم ...مرورا بي عمرو بن ابي ربيعة ...لمن وصل اسماعيل الاعيسر.

• ما خلى ليه (تحنيسة).

• التحانيس العملها هيثم مصطفى لي اكرم الهادي سليم ..تلعبو في (برشلونة).

• اكرم الهادي سليم ..مع فيصل العجب كان ما متعود على التحانيس دي.

• ولا بعرفها.

• عشان كدا ...وقت سمع ليك (تحانيس) هيثم مصطفى قلبو رجف.

• المسكين بقى زي (القصبة).

• ما قدر يستحمل الكلام دا.

• قالوا ليك دموعو من عيونو جرن.

• اكرم الهادي سليم ..طوالي رجع ...شال (الزعلة) من رأسو ...لكن اكرم غتيت بكون (اسر) الزعلة في نفسو.

• والله اكرم دا تخلوه بي زعلتو دي ..يفرتك ليكم المريخ دا فرتيك.

• يخلي ليك المعسكر دا ..واقف على فد رجل.

• كمان اكرم بوصوه.

• قبل الكلام دا ...هيثم مصطفى طبعا دفع قروش الفندق ...(الكلام دا قلت ليكم عرضا قبل كدا في عمود سابق).

• يا جماعة انتوا كمان ما تنسوا.

• خليكم متابعين ..ما معقول انا كل يوم اقعد اعيد ليكم في الكلام.

• هسع ناس المريخ ...قاموا وقعدوا..عارفين في شنو؟.

• في (الديدان).

• مجلس المريخ جاب ليه مهندس زراعي كدا ..عشان يشوف (الديدان).

• المهندس الزراعي اول ..ما شاف ليك (الديدان) ...طلع نضارتو ..تقول (محمود المليجي).

• يا احمد الحاج ما عاوز اقول ليك جيب لي صورة (محمود المليجي)..ما بتكون عندكم في الجهاز.

• انا عارف ...لو محمود المليجي دا لعب اسبوع في اتحاد مدني صورتو ما بتخطاكم.

• لكن المليجي ما لعب ..وما عاوز اقول ليكم ابحثوا في (غوغل)...احمد الحاج مع رجفتو دي يقوم يجيب لي صورة محمود جبارة السادة.

• المهم يا جماعة ..المهندس الزراعي بعد ما طلع النظارة ..وشاف (الديدان)...قال جيبوا لي هيثم مصطفى.

• عاوز شنو بي هيثم ...والله ما عارف.

• احتمال عشان اي مشكلة في المريخ بحلها هيثم مصطفى.

• نسيت اقول ليكم ..هيثم مصطفى مسك ملف طابق شاخور.

• قال عاوز يفك الحجز العليه.

• انت تعال هنا يا سلك ..(محاميتك) الدارسها دي..في شنو؟..في شوربة الجداد.

• ما تفك حجز شاخور دا.

• كمان الحجز عاوزين هيثم مصطفى يفكو ليكم.

• غايتو يا مريخاب هيثم مصطفى دا لو ما كان جاكم المريخ ...كان هسع ناس كلتشي وباسكال واحمد الباشا كلهم في الميناء البري.

• كانوا يكونوا عاوزين يتخارجوا من البلد.

• عشان نادي المريخ بكون قلبوه (طرمبة) في التقشف دا ..وارتاحوا من جوطة الكورة دي.

• لكن الله شافكم.

• مشي جمال الوالي...جاكم (سيدا).

• لكن الليلة بي هيثم في الملعب ...والعجب في الكنبة والحضري في المرمي واكرم في البيت ان شاءالله تأخدوا تلاتة.

• تلاتة عديل كدا.

• ملحوظة : لكن تلاتة ما كتيرة.

هوامش 

• قالوا لي باسكال اقفل لينا تراوري.

• قال ليهم ..انا تراوري ما بقفلو..لكن ممكن اتكلم معاه في موضوع التصويبات دي.

• اقفلو ليه ..ماضي ليه شيك.

• الزول دا لا بتقفل ولا حاجة ..ما تقعدوا تغشوا نفسكم ساكت.

• الصاقعة نزار ..عندو قون الليلة ان شاءالله.

• يا صاقعة ..احسم الحكاية دي من بدري.

• من الدقيقة الخامسة ..وريحنا من الموضوع دا.

• اهلك في كسلا ..منتظرين قونك.

• وناس عطبرة ..على الهبشة ..قالوا لو جبت ليك قون ..كلهم بطلعوا  الشارع.

• بلة جابر ..وضفر ..ونجم الدين ..اي واحد فيهم شايل ليه (منبه) وداخل المباراة.

• عارفين ليه؟..عشان ما يسرحوا من (بشة).

• مرة موسي الزومة سرح من بشة ...الي الان ما رجع التشكيلة.

• سرحة من مباراة القمة الاولى في الممتاز الماضي.

• لي هسع شغالة.

• سرحتك يا موسي زي المسلسل التركي.

• غايتو يا موسي الزومة البشوفك سارح ....يقول عليك (فاروق شوشة).

• عليك الله انت هسع البخليك تسرح شنو؟.

• انت حصل كتبت شعر.

• رسمت ليك لوحة.

• طيب سارح ليه؟.

• ساكت تجيبوا لينا المشاكل.

• مزلقني يا بشة ..سرحني ..مزلقني يا بشة ..سرحني.

• قالوا لي باسكال ..انت اتزلقت ليه في مباراة المريخ وهلال كادوقلي؟.

• قال ليهم اتذكرت ..(ترواري).

• الليلة لو جيتنا في استادنا ..مصبغ شعرك يا بسكال ..ح نعمل ليك الغزالة جاوزت.

• الغزالة جاوزت دي حاجة اصعب من ارنب نط.

• كلمتك انا ..عشان بعدين ما تعمل لي فيها ما عارف.

• الليلة شغال احمد الحاج ..وبكرة شغال معاوية صابر.

• يا احمد دي صفحة طلعت.

• ويا معاوية احجز لي بكرة ان شاءالله صفحتين.

• خلينا (نتبشبش) في الدنيا دي شوية.

• هى الدنيا دي فيها شنو عليكم الله غير (البشبشة) ونزار حامد؟.

• ابوشيبة ما فاضل ليه إلا يمشي الجامع الكبير ويشحد ليه (ضربة جزاء).

• مامون ابوشيبة ليه 21 يوم بكتب عن ضربات الجزاء.

• انتوا هو بتخشوا خط 18 ..عشان يدوكم ضربة جزاء.

• اي هتاف ضد هيثم مصطفى مرفوض.

• اخشي على هيثم مصطفى من جمهور المريخ.

• جمهور الهلال واعي ..وراقي وبحترم تاريخو.

• نحن عاوزين نلعب كورة ..ونغلب عديل.

• بالتوفيق ان شاءالله.

• والهلال منصور باذن الله.

• تعادل ..لا.

• اكرم الهادي سليم ...ذاتو قال : ( يا هو يا بيت ابوي).

• الحضري ما براهو.

• عاجل : ناس هلال كادوقلي ممكن يقدموا شكوى في المريخ  ..نجيلتهم بقت كلها (ديدان).

راهن على إهتمام الواليين كبر وهارون

 

عطا المنان الفاشر وكادوقلي قادرتان على تنظيم سيكافا للأندية بصورة مدهشة

اكد امين مال الاتحاد السوداني لكرة القدم اسامة عطا المنان علي قدرة حكومة ولايتي شمال دارفور وجنوب كردفان ، علي تنظيم بطولة سيكافا للأندية في مدينتى الفاشر وكادوقلي وأشاد اسامة بالجهود الكبيرة التى تبذلها حكومتا الولاية في تنفيذ العديد من المشروعات التنموية ودعمهما المتصل للرياضة عموماً وكرة القدم على وجه الخصوص وكان نتاج ذلك وجود فريقين من الولايتين (هلال كادوقلي ومريخ الفاشر) ضمن منظومة الدوري الممتازة) الأمر الذي يؤكد إستقرار الولايتين.

واضاف اسامة ان قيام البطولة الفاشر وكادقلي من شأنه ان يعطي رسالة واضحة المعالم لم يروجون للشائعات بعدم استقرار الاوضاع الامنية في الولايتين ، وفي قيام التظاهر بالمدينتين يكون ابلغ دليل علي الافتراءات .

يذكر ان البطولة سوف تقام في الفترة ( من الثالث والعشرين من يونيو المقبل 2013م وحتى الرابع من يوليو 2013م المقبل بمشاركة أندية (12) دولة هى السودان وجنوب السودان ويوغندا وكينيا وتنزانيا وزنزبار وبورندى ورواندا وإثيوبيا وإرتريا والصومال وجيبوتى حيث تستضيف الفاشر مجموعتين وتستضيف كادوقلي مجموعة.

 

اللجنة المنظمة لمباراة القمة توقف بطاقات الإعلاميين وتخصص لكل مؤسسة إعلامية ثلاث تذاكر لمحررين ومصور فقط

قررت اللجنة المنظمة لمباراة القمة بين الهلال والمريخ ضمن مباريات الجولة الرابعة لدوري سودانى للمحترفين دخول الإعلامين لتغطية المباراة وذلك بموجب خطاب رسمي صادر من المؤسسات الإعلامية المعنية (مقروءة مسموعة مرئية) وتحديد محررين ومصور لكل مؤسسة إعلامية يتم تسليمهم تذاكر لدخول الإستاد وتحديد أماكن جلوسهم ودخولهم وتم إيقاف جميع البطاقات الإكرامية الخاصة بالإعلاميين في هذه المباراة والتي سيتم الدخول إليها فقط بواسطة البوابات والتذاكر الإلكترونية .

الوزير صديق يشرف القمة اليوم 

يشرف وزير الشباب والرياضة صديق محمد توم مباراة القمة الكروية بين الهلال والمريخ ضمن مباريات الأسبوع الرابع للدوري الممتاز والمقامة مساء اليوم بإستاد الهلال بأم درمان، يذكر أن مباراة القمة اليوم هي أول مباراة يشرفها الوزير بعد تقلده منصبه الجديد ويأمل الوزير ويتطلع أن تخرج المباراة بالمستوى الذي يليق بالقمة الكروية لدعم مسيرة المنتخب الوطني في مراحله القادمة. 

 

السوداني الثاني عربياً في البطولة الدولية للرماية

حقق بطل السودان للرماية حيدر عبد الكريم المركز الثاني عربياً في البطولة الدولية للرماية المقامة باسم أمير دولة الكويت وذلك في منافسات الرماية للبندقية (50 متر) وجاء انتصار بطل السودان معززاً لنجاحات اتحاد الرماية التي حققها بالأمس في انتخابات الاتحاد العربي للرماية واعتماده بعضوية المكتب التنفيذي، وأفادنا رئيس الاتحاد السوداني للرماية الدكتور العميد سيف الدين ميرغني بأن البطولة الدولية من البطولات المعتمدة للاتحاد الدولي للرماية وشاركت فيها 45 دولة من بينها أمريكا، فرنسا، روسيا وبلجيكا ومن بين دول العالم العربي المشاركة البحرين، الكويت، مصر، الأردن، العراق، تونس والسودان. وقد تلقى الاتحاد التهنئة من نائب رئيس اتحاد الرماية بولاية الخرطوم العميد (م) عادل عبد الرحمن درونكي وتهنئة مماثلة من نائب رئيس الاتحاد السوداني للسيارات والدراجات النارية العميد شرطة (م) معاوية عباس. 

 

جمعية أصدقاء الشرطة تستعد لعموميتها

تواصل لجنة تسيير أصدقاء الشرطة أعمالها التحضيرية لدعوة الجمعية العمومية للانعقاد وأكد العميد (م) عادل درونكي في اجتماع عقدته لجنة التسيير برئاسته وبحضور أعضاء اللجنة أن تكون الأعمال التحضيرية لعقد هذه الجمعية متوجة للعودة بأصدقاء الشرطة لسيرتها الأولى وتهيب اللجنة من جميع أعضاء الجمعية المشاركة وحضور الاجتماعات الدورية التي تعقدها لجنة التسيير في الخامسة من مساء يوم السبت من كل أسبوع بدار الجمعية بشارع النيل شمال وزارة الصحة. 

 

المفوضية تحول طلب المريخ للدراسة

اصدرت مفوضية تسجيل الهيئات الشبابية والرياضية بولاية الخرطوم قرارا قضي باحالة طلب مجلس ادارة نادي المريخ الخاص بعقد الجمعية العمومية للنادي في يونيو القادم الي لجنة مصغرة لدراسة الطلب وفقا لقانون هيئات الشباب والرياضة بولاية الخرطوم لعام 2007 ولائحة قانون هيئات الشباب والرياضة بولاية الخرطوم لعام 2008 والنظام الاساسي لنادي المريخ جاء ذلك من خلال الاجتماع الدوري الذي عقدته المفوضية امس بمقرها ببحري برئاسة مولانا زكريا يونس المفوض الولائي حيث استعرض الاجتماع الطلب المقدم من مجلس ادارة نادي المريخ بعقد جمعية عمومية في يونيو القادم لانتخاب مجلس ادارة جديد للنادي قبل انتهاء فترة مجلس الادارة الحالي المنتخب بجمعية عمومية.

 

اما قيام الجمعية العمومية لانتخاب مجلس الادارة الجديد ايضا سيكون علي النحو التالي:

في حالة فقدان المجلس للشرعية لمخالفته لصحيح القانون واللائحة والنظام الاساسي للنادي:

في حالة قيام ثلثي اعضاء اخر جمعية عمومية بسحب الثقة من مجلس الادارة وذلك لانه في الحالتين اعلاه سيكون هناك فراغا اداريا بالنادي سيتم حسمه بقرار وزاري بتعيين لجنة تسيير للاعداد والتحضير لعقد الجمعية العمومية لانتخاب مجلس ادارة جديد لدورة قادمة.

 

المصدر: قوون